القائمة الرئيسية

الصفحات

افضل اماكن صيد البلطي في مصر وموسم كل منطقة

 


افضل اماكن صيد البلطي في مصر وموسم كل منطقة
اعزائى زوار موقعنا الكرام نقدم لكم شرح لافضل واشهر اماكن صيد سمك البلطى فى مصر لكل عشاق ومحبى هواية الصيد مع توضيح لموسم الاكل والصيد ونوع الطعم المفضل فى كل منطقة
اليكم البيان التالى للمناطق المفضلة لصيد البلطى فى مصر
1- من افضل الاماكن منطقة محاجر ابو زعبل سمك بلطى كفافى سريع وقرموط بحجم كبير و السمك هناك كبير و المياة عميقة جدا جدا جدا من 7 متر و فى حتت تيج 12 متر دة كدة و بتصقط امامك وليس بالداخل .
2- من افضل الاماكن منطقة دير الميمون قبل بنى سويف وبعد الكريمات جميع الاسماك وخاصة الرعاد
3- من افضل الاماكن الترعة التى امام البلاجات فى فايد قرموط سريع جدا
4- من افضل الاماكن ترعة الصحافة تروح لها من ابو زعبل تركب عربة باتجاه بلبيس وتنزل الصحافة وتمشى شوية فى الزراعة بلطى سريع5- ترعة معرفش اسمها تروح لها من شبين تركب عربية بتقول الشرابية وممكن تنزل الشرابية او كفر عبد النبى بلطى حلو
6- من افضل الاماكن ترعة القلج خلف السجن بلطى كفافى
7- من اشهر الاماكن أبو الخاو على الهدار طريق الخطاطبة كفر الزيات جميع أنواع السمك بلطي في النهار (ريم) وف الليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
8- من اشهر الاماكن المنصورية و النجيلة ( كفر الزيات ) جميع أنواع السمك بلطي في النهار (ريم) وف يالليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
9- من اشهر الاماكن منطقة كوم شريك ( كفر الزيات ) جميع أنواع السمك بلطي في النهار (ريم) وف يالليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
10- من اشهر الاماكن منطقة قناطر بولين (كفر الزيات ) لطش من على الغلة طوال أيام العام
11- من اشهر الاماكن منطقة منطقة فى حلوان اسمها ركن فروق (و هى مرسى للسنادل الخربانا) اخر طريق الكرنيش فى اتجاة حلوان لحد متلاقى مصنع لمواسير البترول (طعم و عجين ) حداف و غماز ( فلاش باشا )
12- وايضا القناطر هتروح القناطر و تسئل عن سجن القناطر و انزل بعدها عند المطافى و اول يمين قبل الكبرى الى علية الكامين تدخل يمين لحد اللسان و انزل هتلاقى جزر على فكرة الدوار حجارة (طعم ) غماز
13- من اشهر الاماكن منطقة غمازة الصغرى بعد حلوان على الكورنيش هناك ثلاثة ترع موازيين… آخر ترعة أدخل يمين حتى تجد هيش… بلطي جميل أحمر كفافي حجاري بالطعم الموسم من شهر 5 لكن ممكن يشتغل من4


14- ابتداءا من المناشي – منشأة القناطر – ساعات بيقع فيها غلطات محترمة تشتغل صباحا ( بالريم ) و مساءا بالطعم و لو الجو هادي باليل و مافيش زحمة ممكن ترموا حداف بسن 6 أو 5 و طعم محترم ( معنكب ) و تلعبوا على البياض.
15- اتجاه الباجور : بالترتيب كدة : صروة – أو السبع روس و ده دور حداف و غماز
16- بير شمس – و ده دور غماز بالأساس و ساعات الحداف بيشتغل فيه لكن عيبه إنه بعيد شويه
17- الباجور نفسها – و فيها عدة أدوار على الحجر على كيف كيفك بلطي و رعدات
18 – اتجاه نكلا : نكلا نفسها – ولكن أنا ما بفضلش الصيد فيها أولا علشان المية هناك حامية جدا و ما ينفعش فيها غير الحداف و من على البغال مش من البر.. و ثانيا .. علشان الريحة..!!!!
19- أبو غالب : و فيها دورين حلوين جدا عند المجزر و تقدر تشتغل فيهم غماس و حداف و البلطي بتاعها يفرح
20- الحاجر : و هي بعد أبو غالب على طول و فيها كذا دور و أنا بفضل دور المدرسة و سمكها زي أبو غالب تمام
21- الخطاطبة : وهو دور مسلي سواء عند الجامع اللي على الطريق أو قدام على الحجر… و لكن عيبه إن سمكه صغير و الراي فيه كتير ( بالمناسبة الدور ده في يناير تشيل منه تعابين زي ما إنت عايز(
22- كفر داود – دور ريم و طعم و سمكته أكبر شوية من الخطاطبة بس المية فيه حامية و علشان كدة هو دور بالأساس غماس.
23- الدلنجات و دمشق – زي كفر داود بس سمكتهم أكبر و لكن مشوارهم أبعد بكتير.
24 – اتجاه قبلي : الصنادل – دار السلام – و ده مكان قدام شرطة المسطحات و بنروحله بالمعدية و ما تستهونوش بالمكان ده لأن سمكته لو اشتغلت بتطلع منه سمك محترم خصوصا على الحداف .
25- كوتسكا – دور تسلية ( لتعليم الصيد ) بصراحة ما شفتش منه خير.
26- الإخصاص : دور حلو جدا بس لو المية واطية في النيل و بناخد بلطي حلو منه.
27- ميت القايد : دور رائع لصيد الريم صباحا و الطعم في الليل ( الحداف ما ينفعش علشان الحجارة هناك كبيرة و المية سريعة(
28- نزلة عليان (غمازة) – و من هنا نخش على الجد – يعنى عدة نضيفة و خيط جديد و سنون محترمة و ده دور بلطي و رعدات و شيلان و بياض و أنوم.
29- جرزا – زي نزلة عليان بالظبط و هي في الجهة المقابلة منها.
30- من جرزا إلى بني سويف ممكن تعد أكثر من 100 دور على الناحيتين و معظمهم أدوار تقيلة و زي الفل
ودا شرح من صياد محترم جدا للقناطر و الادوار التمام جزاة الله كل خير:
ان القناطر صعب تلم بكل ادوارها كلها لان القناطر فيها فرع رشيد ودمياط والتفرع بيبقى في القناطر وفيها حوالي 4 رياحات(المنوفى ، التوفيقى ، البحيري , الناصري) من اجمل الرياحات قي القناطر المنوفي ميته شديدة جدا فالحداف افضل الطرق وارضه حجارة
الطعم / دود الارض عادي وعنكبوت للبلطي والراي و البياض و الانومة و الدقماق وغلطات شيلان , العجينة للراي و للبني والبلطي و غلطات مبروكة وممكن تطعم للمبروكة من البوص النامي على الجوانب بس تكون حاضرة في المية
زطبعا لعشاق الصيد يعد الرياح البحيري من الرياحات القوية وهي الممتدة على طريق الخطاطبة وفكرته نفس فكرة المنوفي
والرياحات في القناطر كلها او اغلبها ميتها شديدة لان القناطر هي منطقة الهاويس لهذة الرياحات فبتبقى المية في بداية إندفاعها اما التوفيقي والناصري فمعرفش عنهم اي معلومات بصراحة
فرع رشيد في القناطر فحدث ولا حرج فية عندك ياسيدي الكوبري القديم ودا في الصيف شغال طعم وعجين … وطول السنة تقريبا التشميط كويس
ايضا الجرف بين الكبريين ودا دور ممتد بطول المناشي ويقع ما بين الكوبري القديم والكوبري الجديد ودا طعم وريم حلو جدا في الصيف وتشميط طول السنة تقريبا والسمك بلطي وبياض وانوم وقليل جدا من البني وشيلان نادرة جدا
نيجى بعد كده على الكوبري الجديد والرمي من فوق الكوبري ناحية قبلي غير بحري الكوبري قبلي هيبقى زي الجرف والكوبري القديم
اما الرمي من من نفس الكبري بس على بحري بكون على المشاية الملحقة بالكبري
من فوق العيون مباشرة ودي بتكون ميتها شديدة جدا جدا فية مواسم المبروكة بتاكل من عليها في المية الحامية بالطعم (عنكبوت) او ريم او البوص (قصب الفار) وهو البوص النامي على حواف النيل
المواسم دي عادة بتكون في شهر 6 , 7 ,8

ارجو ان ينال شرحنا اعجابكم
مدونة انا صياد مدونة كل عاشق لفنون الصيد

تعليقات